Sortalde, energiarekin erlazionatzeko modu berri bat sustatzea helburu duen ekimen herritarra da. Energiak oinarrizko ondasuna izan behar luke guztiontzat, baina enpresa handiek kontrolatzen dute, pertsonak ahaldundu beharrean beren ondasunak handitzeko helburuarekin. Pertsonak aktibatu nahi ditugu, kontsumitzaileen rol pasiboa atzean utziz. Pobrezia energetikoa murrizteko eta desazkundean urratsak emateko formula berriak bilatu nahi ditugu, jasangarritasuna gure gizartearen hainbat esparrutan hedatzeko asmoarekin: harreman pertsonaletan, ingurunearen zaintzan, kontsumo-ohituretan (elektrizitatea, energia termikoa, elikadura, mugikortasuna, efizientzia…) eta abarretan. Teknologia bakoitzak bere mugak eta eraginak dituenaren jakitun, eredu energetiko berri bat sustatu nahi dugu gure inguruaren beharretarako egokitzen diren alternatibak identifikatuz. Herritar anitz, tokiko enpresa, administrazio publiko, entitate eta eragile ezberdinen artean proiektu kolektiboak gauzatu nahi ditugu.